12/08/2026
✳ဝမ်းပျက်ဝမ်းလျော ရောဂါကာကွယ်ရေးနှင့် ရှေးဦးပြုစုနည်း✳
ဝမ်းပျက်ဝမ်းလျောခြင်းဟာ
ရာသီမရွေး ဖြစ်ပွားနိုင်ပြီး
ကလေးသူငယ်တွေနဲ့ သက်ကြီးရွယ်အိုတွေမှာ ရေဓာတ်ခန်းခြောက်မှုကြောင့် အသက်အန္တရာယ်အထိ
စိုးရိမ်ရနိုင်တဲ့ ရောဂါတစ်ခုဖြစ်ပါတယ်။
⏩ဖြစ်ပွားရသည့် အဓိကအကြောင်းအရင်းများ
-မသန့်ရှင်းသော အစားအစာနှင့် သောက်သုံးရေများကို စားသောက်မိခြင်း
-မစင်မှတစ်ဆင့် ကူးစက်သော ဗိုင်းရပ်စ် (သို့မဟုတ်) ဘက်တီးရီးယားပိုးများ ခန္ဓာကိုယ်အတွင်း ဝင်ရောက်ခြင်း
-တစ်ကိုယ်ရေသန့်ရှင်းမှု အားနည်းခြင်း (ဥပမာ - အိမ်သာတက်ပြီး (သို့မဟုတ်) အစာမစားမီ လက်ကို စနစ်တကျ မဆေးကြောခြင်း)
⏩ဝမ်းပျက်ဝမ်းလျောဖြစ်ပါက
ဆောင်ရန်များ
1. ဓာတ်ဆားရည် သောက်ပါ။
ဝမ်းသွားသည့်အခါတိုင်း ခန္ဓာကိုယ်မှ ဆုံးရှုံးသွားသော ရေနှင့် ဆားဓာတ်များကို ပြန်လည်ဖြည့်တင်းရန် ဓာတ်ဆားရည်ကို နည်းနည်းနှင့် ခဏခဏ သောက်ပေးပါ။
2. ကျန်းမာရေးနှင့် ညီညွတ်သော အစာ ပျော့ပျော့ စားပါ။
ဆန်ပြုတ်၊ စွပ်ပြုတ်၊ ငှက်ပျောသီး စသည့် ကြေလွယ်သော အစားအစာများကို အနည်းငယ်စီ စားသုံးပါ။
3. နို့စို့ကလေးများကို နို့ဆက်တိုက်ပါ။
မိခင်နို့တိုက်ကျွေးနေသော ကလေးဖြစ်ပါက ပုံမှန်ထက် နို့ပိုတိုက်ပေးပါ။
⏩ရှောင်ရန်များ
-ဝမ်းရပ်ဆေးများကို ဆရာဝန်ညွှန်ကြားချက်မပါဘဲ မိမိသဘောဖြင့် ဝယ်မသောက်ပါနှင့်။
-အချိုရည်များ၊ ကဖိန်းဓာတ်ပါသော သောက်စရာများနှင့် အဆီများသော အစားအစာများကို ရှောင်ကြဉ်ပါ။
မည်သည့်အချိန်တွင် ဆရာဝန်နှင့် ပြသရမည်နည်း။
-ဝမ်းသွားသည့်အကြိမ်အရေအတွက် များလွန်းခြင်း
- မူးဝေခြင်း၊ နုံးခွေခြင်း ၊ သတိလစ်ခြင်း
- ပြင်းထန်စွာ ဗိုက်အောင့်ခြင်း ၊ဖျားခြင်း
-ဝမ်းထဲတွင် သွေးပါခြင်း
-ကလေးငယ်များတွင် မျက်တွင်းဟောက်ပက်ဖြစ်ခြင်း၊ ငိုလျှင် မျက်ရည်မထွက်ခြင်း၊ ဆီးနည်းသွားခြင်း
⏩ကာကွယ်နည်းများ
-အစာ မစားမီနှင့် အိမ်သာတက်ပြီးတိုင်း လက်ကို ဆပ်ပြာဖြင့် စက္ကန့် ၂၀ ကြာ အောင် စနစ်တကျ ဆေးကြောပါ။
-ရေကို ကြိုချက်သောက်ပါ။
-ယင်မနားသော အစားအစာများကိုသာ ပူပူနွေးနွေး စားသုံးပါ။
For You
Healthy Lifestyle Products Yangon
