Fondation pour l'Enfance - Terre de Paix

27/10/2026

Balans Zanfan Dan Dra
Stazier depi Netherlands ek mwa finn tini dra bien ek dan enn fason kot zanfan konfortab e nou finn balans zot dousma avek boukou prekosion sakenn son tour. Sa aktivite-la finn permet zanfan fer enn nouvo lexperyans pou devlop zot konfians ek santi zot an-sekirite. Sa finn osi ed zanfan pran konsians zot lekor, zot mouvman e zot sans lekilib.
Zanfan inn osi gagn lokazion obzerv deroulman aktivite-la ek aprann met bann konsign ki’nn donn zot an pratik. Sa ti bien evey zot kiryozite.
Merci
Mis Dorianne
Les Mirabelles Cap Tamarin

26/10/2026

Nou dekouver nou bann santiman atraver zwe.

Bann zanfan finn dekouver diferan lemosion atraver bann vizaz ki reprezant diferan santiman, kouma lazwa, tristes, koler ek lezot lemosion.
Atraver sa aktivite-la, zanfan finn aprann rekonet ek idantifie lemosion lor l vizaz. Zot finn osi gagn lokazion exprim zot prop santiman ek konpran ki sak dimounn kapav resanti bann lemosion diferan.
Sa aktivite-la favoriz langaz, kominikasion, devlopman sosial ek emosionel, ek aprann zanfan respekte ek konpran santiman lezot.

Sa finn ed zanfan vinn pli konsian lor zot lemosion, aprann exprim zot santiman ek devlop zot kapasite pou viv ek kominik avek lezot.

Mersi
Joane
Lekip nursri cedcd

25/10/2026

Zwe OX
Zanfan dan gardri Kids R Kids finn partisip dan enn ti aktivite zwe OX an-group, kot sakenn inn poz zot X ou O dan diferan kaz pou sey fer enn lalign. Zanfan inn pran plezir pou zwe OX ansam.
Atraver sa zwe-la, zanfan inn apran atann zot tour, respekte zot kamarad ek swiv bann reg osi. Sa inn osi ed zot develop zot konsantration, reflexion, kordinasion lame e lizie.
Zot inn pas enn bon ti moman amizan ansam kot sakenn inn aprann, reflesi e partaze.
Anielle
Kids R Kids

24/10/2026

Enn zoli rankont ranpli ar dekouvert ek linspirasion dan lotel Hilton Mauritius Resort & Spa

Dan kad nou program formasion 16+, ki soutenir nou bann zenn dan zot preparasion pou lavi profesionel, nou finn ena plezir pou profit enn lexperyans anrisisan dan Hilton Mauritius Resort & Spa. Boukou plis ki enn sinp vizit lotel, sa rankont-la ti enn zoli lokazion pou nou bann zenn dekouver enn nouvo lemond, pou aprann, pou poz kestion, ek sirtou, pou reve lor zot lavenir.
Nou finn gagn enn bon lakey Ms. Kelly Carver, Learning and Development Manager, ki finn ouver laport sa letablisman-la pou nou avek boukou bonte ek zenerozite.
Pou koumans sa zoli gramatin-la, nou bann zenn inn gagn lakey avek bann delisie cocktail ek kouki dan enn latmosfer amikal. Enn ti icebreaker finn permet tou dimounn santi zot alez, kas laglas, e profit lexperyans-la plennman. Depi koumansman, nou finn santi ki sa rankont-la ti pou boukou plis ki zis enn sinp lintrodiksion.
Avek boukou lantouziasm, Madam Carver finn prezant nou lemond Hilton, so listwar, so expansion global, ek bann diferan rol ki gard enn lotel mars bien. Nou bann zenn finn donk kapav dekouver diversite loportinite profesionel dan sekter lospitalite, depi travay resepsion ziska catering, inklir zesion ek boukou lezot domenn.
Me seki finn rann sa renion-la partikilierman tousan se latansion sinser Madam Carver anver nou bann zelev. Li pa finn zis partaz linformasion, li ti pran letan pou ekout zot, pou konpran zot santiman, ek pou poz zot kestion lor zot bann rev. Sa bann ti moman konversasion-la finn permet nou bann zelev santi zot ena valer e konpran ki zot bann laspirasion ena valer.
Li finn osi partaz so prop parkour karyer, li finn explike kouma perseverans, zefor, ek enn volonte pou avanse finn permet li mont lor lesel. So temwaniaz ti enn rapel pwisan pou nou bann zenn: sakenn progrese a so prop ritm, e avek motivasion, kouraz, ek loportinite, li posib forz so prop sime.
Lexperyans-la finn kontinie avek enn letour lotel-la, ki finn kaptiv nou bann etidian avek so bote ek so bann karakteristik inovater. Zot ti partikilierman inpresione kan zot finn aprann ki lotel-la transform delo lamer an delo potab, prodir so prop dimiel, ek kiltiv sertin lerb aromatize ki servi dan so lakwizinn. Sa bann linisiativ-la finn permet zot dekouver enn lot laspe lindistri lospitalite: kreativite, responsabilite, ek respe pou lanvironnman.
Zot finn osi aprann lor devlopman karyer ek bann loportinite formasion ki group Hilton ofer, notaman atraver Hilton Careers ek so bann partenarya avek bann liniversite. Sa bann diskision-la finn ed zot konpran ki enn travay kapav pwin depar pou enn karyer ris an laprantisaz ek bann nouvo posibilite.
Pandan vizit-la, nou finn trouv bann zenn ki ti kirye, atantif, ek etone par seki zot ti pe dekouver. Pou sertin, sa lexperyans-la kapav finn deklans bann nouvo lide; pou lezot, li ti kapav sinpleman permet zot mazinn enn lavenir ki zot pa ti ankor konsidere.
Se zisteman bote nou program 16+: donn nou bann zenn lokazion pou dekouver lemond otour zot, pou ena plis konfians dan zot-mem, e pou konpran ki zot lavenir kapav ekrir dan plizier fason diferan.
Enn gran mersi a Madam Kelly Carver pou so lakey bien akeyan, so lekout atantif, so bonte, ek pou partaz so lexperyans, osi bien ki a lekip antie dan Hilton Mauritius Resort & Spa pou sa zoli lokazion-la.
Parski andeor bann travay ek bann dekouvert, nou sorti avek enn zafer presie: souvenir enn rankont imin ki ankouraz nou bann zenn pou krwar dan zot rev e pou oze konstrir zot lavenir, enn letap alafwa.

Florian Nadal
ADS

23/10/2026

Fabrikasion maryonet
Dan Sant Devey La Valette, zanfan inn partisip ansam dan enn zoli aktivite kreatif avek stazier Neli kot zot finn ede pou fabrik nouvo maryonet. Sakenn inn gagn lokazion partisip dan diferan letap, manipil bann materyel e sirtou travay an kolaborasion avek zot ti kamarad.
Apre ki zot finn fini fabrik zot maryonet, zanfan finn gagn lokazion zwe avek zot prop kreasion. Nou finn donn bann maryonet bann nom, bann lavwa e bann ti rol, e nou finn komans kre bann ti zistwar.
Enn zoli moman ki’nn permet bann zanfan servi zot limazinasion, develop zot langaz e travay an-group.
Mis Joanique
Gardri, Sant Devey La Valette
Bambous

22/10/2026

🌱🥬 From seeds to harvest, from garden to table! 💚

Today was harvest day, and what a joy to see the fruits of our efforts! 🌿

From planting the seeds to caring for the plants every day, our children can discover the beauty of nature, the value of patience, and the importance of caring for what we grow.

And the best part? Our harvest will find its way to the lunch table, bringing fresh produce to nourish our children. 🥗❤️

A little seed, daily care, and lots of love — growing not only vegetables, but also valuable life lessons!

21/10/2026

https://www.facebook.com/share/17w6ef2QLz/

Par Clyde Augustin Terre de Paix disposera bientôt d’une nouvelle maison d’accueil. Située à Canot, cette structure pourra accueillir quatre à cinq familles supplémentaires en situation de vulnérabilité pour bénéficier du programme d’accompagnement proposé par l’organisation. Ce pr...

20/10/2026

Ti Loto
Bann zanfan dan gardri Les Mirabelles Grand Baie inn gagn lokazion pou partisip dan enn aktivite bien amizan ek kreatif. Zot finn servi bann ti loto ki zot inn tranpe dan diferan kouler lapintir kouma rouz, ver ek ble, apre zot inn fer bann loto-la glise lor enn ladesant ek alafin ena papie blank inn mete pou ki li kapav fer bann form diferan kouler. Sa finn permet bann zanfan dekouver enn nouvo fason pou fer lapintir ek kre bann zoli travay artistik.
Atraver sa aktivite-la, bann zanfan inn devlop zot kreativite, imazinasion ek sans explorasion. Zot finn osi travay lor zot motrisite finn ek global, kouma pou kontrol zot bann mouvman lame, ek aprann konpran kouma zot aksion kapav kre diferan form lor papie.
Aktivite-la finn osi ena enn gran linpak lor zot lemosion. Bann zanfan finn exprim zot lazwa, kiryozite ek eksitasion pandan ki zot ti pe get zot bann ti loto glisse . Zot inn gagn lasans sakenn son tour glis zot ti loto lib, kouma zot anvi par zot-mem, pran bann ti desizion ek trouv satisfaksion dan zot kreasion.
Sa kalite aktivite lib ek sansoryel-la donn bann zanfan enn lespas pou eprim zot lekor ek zot lemosion dan enn fason natirel, pandan ki zot p aprann atraver zwe.

19/10/2026

Inn akonpagn bann mama atraver enn sesion swin seve pou ed zot devlop plis konfians an zot-mem ek pran swin zot prezantasion personel. Pandan sa aktivite-la, bann mama finn gagn plis konesans lor bon pratik lizienn seve ek fason pou pran swin zot-mem. Sa finn permet zot santi zot plis valorize ek krwar plis dan zot kapasite. Lankourazman pandan sa moman-la finn kre enn lespas kot zot kapav exprim zot-mem ek partaz zot lexperyans. Sa aktivite-la finn kontribie pou amelyor zot lestim pou zot-mem ek zot bienet zeneral.
Bhandooa L.U Monica