Sjøtunet

24/04/2026

Ein liten hyllest til kårfolk.
⠀⠀⠀⠀⠀⠀⠀⠀⠀
I Sjøtunet bur me fire generasjonar. Ganske unikt, har me høyrt, og heilt nødvendig i framtida, las me på NRK. Men òg heilt vanleg før i tida, veit me frå historiebøkene, då alle på garden hadde mål og meining, etter livsfase og evne.
⠀⠀⠀⠀⠀⠀⠀⠀⠀
Kårfolket i Sjøtunet ser ikkje poenget med «å sitje i eit horn på veggen» (direkte sitat). Dei veit kvar skoen trykkjer etter høvesvis 30 og 70 år i tunet.
⠀⠀⠀⠀⠀⠀⠀⠀⠀
Sengene du sig ned i etter ein dag ved fjorden er utstyrte med sengetøy frå farmor Torunn sitt dugnadsvaskeri. Handkleet du tek med deg på veg ut av dusjen har (olde)Besto Gyda bretta, med brettekantar som for øvrig burde nominerast til raudlista for handverksteknikkar. Årets nybeisa verandaer og vindfang tok Torunn seg av før me rakk å trekkje lodd om kven som skulle springe etter eittåringen og kven som skulle beise. Syltetøykoking deler me mellom tre generasjonar, men ingen er raskare til å koke nytt når noko er utselt og etterspurt enn Sjøtunet sin syltetøyutviklar, Torunn. Og ingen får til finare farge på Victoriaplommesyltetøyet enn Gyda. Når søyene lammar, potetene må setjast i går, det står ein gravemaskin i fjøra og nye gjester sjekkar inn – helst samstundes – er det alltid tid og plass til den nyaste generasjonen hos farmor og «Besto». Og ein fersk kopp kaffi med noko attåt mellom slaga.
⠀⠀⠀⠀⠀⠀⠀⠀⠀
Det fungerer svært bra, dette generasjonstunet. Så ligg det òg ei intergenerasjonell rausheit i at kvar og èin av oss har fått forme sitt liv og levnad i Sjøtunet på eigne premiss.
⠀⠀⠀⠀⠀⠀⠀⠀⠀
Gi kårfolket litt ekstra kjærleik inn i helga og ny høgsesong♥️👆

21/04/2026

21/04/2026

Siste sjanse for eit par netter på dei lune soveromma på Sjøloftet i fellesferien: 28.–30. juni. Elles er Sjøloftet fullbooka frå 20. juni til 20. august. Naustet har meir ledig, men det går unna på bookingsidene om dagen.
⠀⠀⠀⠀⠀⠀⠀⠀⠀
Dette er di venlege påminning om at dersom du vil ta nokre sommardagar i ei hytte i fjordkanten med eigen uteplass, strandlinje og badetrapp, god kaffibrygging og kjøkken med variert nok innhald til å nyte overflodshornet av råvarer du finn i fjorden, skogen og grenda rundt oss – så bør du sikre deg no.
⠀⠀⠀⠀⠀⠀⠀⠀⠀
Hjarteleg velkomen til oss og til Hardanger. No byrjar bløminga straks! 🌸

https://www.sjotunet.no/besok-oss/overnatting/

11/04/2026

Oppvarminga til høgsesongen er så smått i gang. I vinter har vi mellom anna oppgradert kjøkenet på Naustet, bygd bokhyller, fått betre madrassar på hemsen på Sjøloftet, og fylt hyttene med god litteratur, spel og puslespel.

Vi har knoppar og gåsungar på trea, og ein herleg flokk med store andungar på plass i forkant av snigelgeriljaen – så vi kanskje endeleg kan få litt fart i grønsakhagen og ikkje berre levande julepynt 🐌🦆

Husa blir igjen fylte av gamle og nye gjester, og vi gler oss til å ta dykk alle imot. Sommaren fyller seg fort opp, men det er framleis ein god del ledig i forkant og utover hausten – som helgas gjester påpeikte: her er det herleg i all slags vêr.

Velkomen til ein ny vår og sommar i Sjøtunet.

05/03/2026

Hunden din er alltid velkommen i Sjøtunet. Ulla melder om at hundelivet er godt her, sjølv med bandtvang 365 dagar i året.

04/03/2026

Hurra!
⠀⠀⠀⠀⠀⠀⠀⠀⠀
I dag har me fått beskjed om at me får tilskot fra Landbruksdirektoratet til spesielle miljøtiltak i jordbruket (SMIL-midlar) i samband med restaurering og sikring av grunnmuren på Sjøhuset.
⠀⠀⠀⠀⠀⠀⠀⠀⠀
Slike tilskotsordningar er ikkje berre kjærkomne i prosjektrekneskapen til eit landbruksføretak, men òg ein god klapp på skuldra for ein liten småbrukarfamilie med tidvis hårete mål (som ikkje akkurat handlar om å bli gasellebedrift). Å investere i restaurering av kulturminne kostar fort meir enn det smakar. No er me eitt steg nærare på vegen mot å ta med oss Sjøhuset vidare inn i komande generasjonar. Det betyr mykje for oss å få høve til å sikre, restaurere og bruke den historiske bygningen med omsyn til både eigne verdiar, til antikvariske prinsipp og til vidare drift og utvikling av småbruket og reisemålet Sjøtunet.
⠀⠀⠀⠀⠀⠀⠀⠀⠀
Biletet viser eit måleri av Sjøtunet og Rykkje datert 1917. Etter å ha samanlikna det med ein del foto og dokument har me kome fram til at kulturlandskapet nok er ganske stilisert i høve til røynda, men Sjøhuset er ikkje tukla med. (Og det har ikkje me tenkt til heller).

13/02/2026

I desember 1902 var det storbrann i Sjøhuset. Her har me funne spor både i lokalavisa sitt digitalarkiv og i bjelkelaget under golvet i første etasje 👆

07/02/2026

Så går me i gang med første fase av restaureringa av Sjøhuset frå 1850-talet. I første omgang skal grunnmuren sikrast. Etter nokre månader med dokumentasjonsarbeid, gode råd frå Hardanger og Voss museum Hardanger Fartøyvernsenter og grundig prosjektering frå Kvam Maskin og Transport , er me klare.
⠀⠀⠀⠀⠀⠀⠀⠀⠀
Den opphavlege tørrmuren viser spor etter fleire reparasjonar (me reknar med minst éin, etter brannen i 1902). KMT har kome fram til ei løysing som i størst mogleg grad let oss ta vare på grunnleggjande antikvariske prinsipp ved at inngrepet er avgrensa, reversibelt og ikkje fører til endringar i bygningen sin opphavlege konstruksjon eller materialbruk. I praksis betyr det at dei delane av grunnmuren som vart rivne ut av stormen «Amy», skal få koma tilbake på plass, og at huset skal jekkast opp og tilbake i posisjon. For å (forhåpentlegvis) sikra oss mot dei neste 170 åra med klimautfordringar, skal ein parallell sikringsmur byggjast på utsida av den eksisterande muren. Lyfter me blikket frå vårt sjøhus til naust og sjøhus generelt, kan prosjektet sjåast som eit klimatilpassingstiltak innan kulturminnevern, med overføringsverdi til tilsvarande bygningar og kulturmiljø i kystsona, der utfordringar knytte til erosjon, stormflo og fundamentering er aukande.
⠀⠀⠀⠀⠀⠀⠀⠀⠀
Interessert i meir? Restaureringsprosjektet i sjøhusa på Vibrandsøy er eit godt og inspirerande døme på vellukka sikring av sjøhus- og naustmiljø langs kysten (spør Google om lesestoff). Riksantikvaren har dessutan utarbeidd bevaringsstrategiar for både kysten sine og landbruket sine kulturmiljø, som har vore (og vil vera) nyttige for oss både i restaureringsprosjektet me no er i gang med, og i vidare planar for vedlikehald og drift av det 170 år gamle småbruket vårt.
⠀⠀⠀⠀⠀⠀⠀⠀⠀
Og PS – me har mellombels stengt Sjøloftet for booking, i første omgang eit stykke ut i mars. Det ligg vegg i vegg med Sjøhuset, og med anleggsarbeid rett utanfor vindauge og balkong tenkjer me at det er like greitt. Når me først er i gang, nyttar me låg­sessongen til å gjera nokre små oppgraderingar på kjøkenet i Naustet, så bookinga der er stengd ut februar. Me seier ifrå når hyttene er klare for gjester igjen.

28/01/2026

Om du er ein ihuga vinterbadar, er det ofte enkel tilgang til fjorden på denne tida av året – og like kort veg inn i varmen på Naustet og Sjøloftet. Velkomen til kulda og varmen, frysinga og kosinga 🔥❄️

17/01/2026

Grunnar til å vitje Sjøtunet og Hardanger om vinteren 👆
⠀⠀⠀⠀⠀⠀⠀⠀⠀

15/01/2026

Godt nytt år frå Sjøtunet!
⠀⠀⠀⠀⠀⠀⠀⠀⠀
Me går inn i vårt fjerde år som drivarar og skundar oss sakte i den retninga vi har ønskt oss (og tilpassa etter erfaringane frå åra som har gått). Det er spesielt hyggeleg å ta imot gamle og nye gjester som ser og set pris på det me har å tilby, stort og smått.
⠀⠀⠀⠀⠀⠀⠀⠀⠀
Stormen «Amy» herja godt i fjor haust og viste sine sterkaste musklar på Folgefonna på andre sida av fjorden. Vinden derifrå tok turen ned over fjorden, og dei påfølgjande bølgjene frå søraust trefte den 180 år gamle grunnmuren på sjøhuset vårt med truande kraft. Me kom frå det med mindre skadar (og skrekken) og blei minna om at sjøhus og naust er blant dei mest truga bygningstypane og kulturminna i Noreg. Sidan har me fordjupa oss i arkivet av skøyte, avisartiklar, glasplatefotografi og annan historisk dokumentasjon frå Sjøtunet sine snart 180 år.
⠀⠀⠀⠀⠀⠀⠀⠀⠀
Den eldste delen av sjøhuset vårt stammar frå 1840–50-talet og stod her medan hardangerjakter blei bygde i fjæra vår på 1850–60-talet. Det var varelager då den første landhandelen i Øystese sokn blei etablert her i 1860. Det brann nesten heilt ned (og blei bygd opp att) i 1902. Det blei utvida med den «nye» delen med fjøs og fórlager i 1928. Sjøhuset har mykje å fortelje om kulturhistoria til landbruket og Hardangerfjorden, og det har gjort seg fortent til å stå i minst 180 år til.
⠀⠀⠀⠀⠀⠀⠀⠀⠀
Fortsetjing følgjer…!