23/08/2026
साथीहरू, नमस्कार।
तपाईंहरूलाई थाहा नै छ, आजभन्दा करिब तीन महिना अगाडि काठमाडौं, भक्तपुर र ललितपुर जिल्लामा, विशेषगरी काठमाडौं उपत्यकामा, बर्ड फ्लुको ठूलो समस्या देखिएको थियो। त्यस समयमा पोल्ट्री फार्महरूले उत्पादन गरेका चल्ला बिक्री तथा बाहिर पठाउन कठिन भयो। बर्ड फ्लुको जोखिमका कारण धेरै किसान तथा उत्पादकहरूले चल्ला बाहिर पठाउन सकेनन्।
त्यस समयमा चल्ला उत्पादनका लागि पालिएका प्यारेन्ट माउहरूमा पनि ठूलो क्षति भयो। विशेषगरी भक्तपुर र ललितपुर क्षेत्रमा धेरै फार्मका प्यारेन्ट माउहरू बर्ड फ्लुका कारण मरे। यी माउहरू चल्ला उत्पादनका लागि विशेष रूपमा भ्याक्सिन लगाएर पालिएका हुन्छन्। त्यसैले माउको संख्यामा आएको कमीले अहिलेको चल्ला उत्पादनमा समेत प्रत्यक्ष असर परेको छ।
अहिले काठमाडौं, भक्तपुर र ललितपुर क्षेत्रबाट पहिलेको तुलनामा चल्ला उत्पादन घटेको अवस्था छ। यद्यपि, हाम्रो फार्मको हकमा भने उत्पादन दर घटेको छैन। हामीले विगतमा जति संख्यामा चल्ला उत्पादन गर्दै आएका थियौँ, अहिले पनि लगभग त्यही अनुपातमा उत्पादन गरिरहेका छौँ। तर बर्ड फ्लुका कारण अन्य क्षेत्रमा प्यारेन्ट माउको संख्या घटेपछि त्यहाँबाट चल्ला लिइरहेका धेरै किसानहरू अहिले हामीकहाँ आउनुभएको छ। यसले गर्दा हाम्रो नियमित उत्पादनभन्दा माग धेरै बढेको छ।
चल्ला उत्पादन तत्काल बढाउन सकिने कुरा होइन। एउटा चल्ला उत्पादन गर्न आवश्यक प्यारेन्ट माउ तयार गर्न करिब ६ देखि ८ महिनाअघि नै योजना र तयारी गर्नुपर्छ। माउ पाल्नुपर्छ, भ्याक्सिन लगाउनुपर्छ, अन्डा उत्पादन हुने अवस्थासम्म पुर्याउनुपर्छ र त्यसपछि मात्रै ती अन्डाबाट चल्ला उत्पादन गर्न सकिन्छ। त्यसैले अहिले माग बढ्यो भन्दैमा भोलि वा एक हप्ताभित्रै उत्पादन बढाउन सम्भव हुँदैन।
हामीसँग अहिले जति प्यारेन्ट छन् र जति अन्डा उत्पादन भइरहेको छ, त्यसैको आधारमा चल्ला उत्पादन भइरहेको छ। अतिरिक्त अन्डा वा अतिरिक्त उत्पादन क्षमता हामीसँग तत्काल उपलब्ध छैन। त्यसैले अहिले धेरै किसान साथीहरूलाई चल्ला उपलब्ध गराउन कठिन भइरहेको अवस्था छ।
हामीसँग नियमित रूपमा चल्ला लिइरहनुभएका किसानहरूलाई प्राथमिकताका साथ मिलाएर चल्ला पठाइरहेका छौँ। नयाँ किसान साथीहरू पनि हामीसँग सम्पर्कमा आउनुभएको छ। उहाँहरूलाई पनि सकेसम्म मिलाएर चल्ला उपलब्ध गराउने प्रयास गरिरहेका छौँ। तर आज फोन गरेर भोलि वा एक हप्ताभित्रै ठूलो संख्यामा चल्ला चाहियो भन्दा तत्काल उपलब्ध गराउन सक्ने अवस्था छैन। केही दिन धैर्य गर्नुभयो भने बिस्तारै सबैको सेड्युल मिलाउँदै जाने हाम्रो प्रयास छ।
धेरै किसान साथीहरूले फोन गर्दा फोन नउठेको गुनासो पनि गर्नुभएको छ। अहिले चल्लाको माग धेरै बढेको र एउटै विषयमा धेरै फोनहरू आइरहेकाले फोन व्यवस्थापन गर्नसमेत कठिन भइरहेको छ। चल्ला पर्याप्त भएको अवस्थामा यस्ता फोनहरू सामान्य हुन्थे, तर अहिले सीमित उत्पादन र अत्यधिक मागका कारण सबैलाई तुरुन्तै चल्ला उपलब्ध गराउन हामीलाई निकै कठिन भइरहेको छ।
हामीले मागअनुसार चल्ला उत्पादन गर्न खोज्दा गुणस्तरमा असर पर्न सक्ने सम्भावना हुन्छ। त्यसैले संख्या मात्रै पूरा गर्नेभन्दा गुणस्तरीय चल्ला उत्पादन र किसानको दीर्घकालीन हितलाई प्राथमिकता दिनुपर्छ। यही कारणले हामी सबै किसान साथीहरूलाई धैर्य गर्न अनुरोध गर्दछौँ।
अन्य ह्याचरीबाट चल्ला लिने साथीहरूले पनि अत्यधिक दबाब नदिनुहोला। छिटो चल्ला चाहियो भन्दैमा ह्याचरीलाई क्षमताभन्दा बढी उत्पादन गर्न दबाब दिइयो भने संख्यात्मक आवश्यकता पूरा भए पनि चल्लाको गुणस्तरमा असर पर्न सक्छ। त्यसैले सकेसम्म पहिले नै आफ्नो आवश्यकता र मिति तय गरेर सोहीअनुसार चल्ला राख्ने योजना बनाउन अनुरोध गर्दछौँ।
यो अवस्था अस्थायी हो। बिस्तारै प्यारेन्टको संख्या र उत्पादन क्षमता बढ्दै गएपछि चल्लाको आपूर्ति पनि सहज हुँदै जानेछ। त्यसैले सबै किसान साथीहरूले परिस्थितिलाई बुझिदिनुहुन, केही समय धैर्य गरिदिनुहुन र योजनाबद्ध रूपमा चल्ला राखिदिनुहुन अनुरोध गर्दछौँ।
हामी पनि सकेसम्म सबै किसान साथीहरूलाई मिलाएर चल्ला उपलब्ध गराउने प्रयास गरिरहेका छौँ। तपाईंहरूको सहयोग र समझदारीको अपेक्षा गर्दछौँ।
धन्यवाद।
माडी टर्की तथा लोकल फ़ार्म
तारा प्रसाद पाण्डे
