Alam mo yung pakiramdam na bigla ka na lang naghanap ng pwedeng magpa-anghang ng pagkain mo pero sawang-sawa ka na sa mga nabibiling chili sauce sa supermarket?
Ganyan ako nagsimula.
Isang araw, pagod na pagod ang utak ko dahil sa dami ng trabaho at gusto ko kumain ng ma-anghang na pagkain. Na-alala ko paborito ko ang Sriracha at Tabasco. Ang problema lang e na-manhid na yung dila ko sa anghang nang mga chili sauce na yan.
Kaya naman naisipan kong subukan na gumawa ng sarili kong bersyon ng chili sauce. Ayon, takbo bigla sa Puregold.
Namili ako ng sili, bawang, sibuyas, s**a, as**al, at yung ibang rekado na hindi ko pwedeng ilagay dito. Baka malaman nyo ang malupit na sikreto ng chili sauce ko.
Ayon, pag uwi sa bahay tinadtad ko lahat ng rekado, sinalang sa kalan, pagkatapos sinalang sa blender. at tadaaaah! May chili sauce na ako.
Nung mga panahon na yon, na-ipit sa lockdown yung kapatid ng bayaw ko. Ang hindi ko alam e mahilig din pala siya sa ma-anghang. Dinalhan ko sila ng isang malaking jar ng chili sauce (na-takaw tingin ako at napasobra ang gawa).
Nagulat ako dahil wala pang isang linggo e naubos na nila ang chili sauce na binigay ko (ginagawang rice topping). Hanggang sa kumalat na - natikman ng mga kaibigan at kamag-anak ng bayaw ko, natikman ng kapitbahay namin, natikman ng mga kaibigan ko, at ibang kamag-anak.
Isang araw, sobrang busy ako sa trabaho at bigla na lang sinabi ng ate ko, “Ibenta natin yung chili sauce mo, baka dyan tayo yumaman”.
Yung pag-yaman e hindi ko naman talaga inisip. Pero dahil nakatanggap ako ng magagandang feedback galing sa mga nakatikim, naisip kong subukan.
Dalawang linggo ang nakalipas nung simulan ko ang pagbebenta. Nakarating sa Laguna, sa Rizal, sa Makati, at kung saan-saang lupalop ng Paranaque yung produkto ko at nakapagbenta agad ako ng 300 na bote.
Hindi ko alam kung anong meron sa chili sauce ko na wala sa iba. At hindi ko din ipag-yayabang na angat ang produkto ko sa ibang nagbebenta.
Sa totoo lang, di talaga ako sigurado kung masarap ba talaga yan O hindi. #Bakalangmasarap.
At yung pangalan ng produkto ko, simple lang ang pinanggalingan nyan. Yung mga naka-tikim ng free sample e napa “Inaykopo” sa anghang. Kasi maanghang nga naman talaga. Wasak yung gilagid mo kapag hindi ka nag-ingat. Kaya na-isip ko na gamitin ang brand na “Inaykopo”.
Hanggang ngayon, tuloy-tuloy ang pag-gawa at padami ng padami ang mga umo-order. Halos lahat resellers.
Hindi ko alam kung hanggang saan aabot itong produkto na to. Pero isa lang ang sigurado, iba ito sa mga chili sauce na na-tikman mo.
Kung masarap ba talaga o hindi, ewan ko. Ibibigay ko ang pag-husga sayo.
