08/08/2026
Saludo kami sayu😀
ESTUDYANTENG TAGA-ROSARIO CAVITE, INSPIRASYON SA KABATAAN
Habang maraming kabataan ang abala sa social media at iba pang libangan, pinili ng 16-anyos na si Aldrin Yabo Suclan na unahin ang pag-aaral at pagtulong sa kanyang pamilya.
Bilang Grade 10 student ng Bagbag National High School, araw-araw niyang pinatutunayan na ang sipag at disiplina ang tunay na susi sa pag-abot ng pangarap.
Bunso sa tatlong magkakapatid si Aldrin. Nang pumanaw ang kanilang ama, ang kanyang ina na lamang ang nagsumikap bilang helper sa gulayan sa palengke ng Tanza, Cavite upang maitaguyod ang kanilang pamilya.
Dahil dito, nagpasiya siyang maghanapbuhay upang makatulong sa kanilang gastusin.
Mahigit isang taon na siyang nagtatrabaho sa Tapsi Express sa Kalye Tramo, Barangay Bagbag I, Rosario, Cavite.
Mula alas-6:00 ng gabi hanggang alas-11:00 ng gabi, masipag niyang ginagampanan ang kanyang trabaho kapalit ng ₱250 na arawang sahod, halagang malaking tulong para sa kanilang pamilya.
Sa kabila ng kanyang trabaho, hindi niya pinababayaan ang kanyang pag-aaral.
Paborito niya ang Mathematics dahil naniniwala siyang ang bawat problemang nalulutas ay naghahanda sa kanya sa mas malalaking hamon ng buhay.
Mas higit pa sa kita ang dahilan ng kanyang pagsisikap.
Pangarap niyang maging sundalo balang araw upang makapaglingkod sa bansa at mabigyan ng mas maayos na buhay ang kanyang pamilya.
Para kay Aldrin, walang maliit na trabaho kung ito ay marangal.
Naniniwala siyang ang sipag, tiyaga, disiplina, at pananampalataya ang magdadala sa kanya sa tagumpay.
Sa kanyang mensahe sa kapwa kabataan, hinikayat niya ang mga estudyanteng huwag ikahiya ang pagtatrabaho habang nag-aaral at huwag hayaang maging hadlang ang kahirapan sa pag-abot ng mga pangarap.
Nagbigay rin siya ng paalala na pahalagahan ang mga magulang at suklian ang kanilang sakripisyo sa pamamagitan ng pagsisikap at pagiging responsable sa buhay.
Samantala, ipinahayag ni Jayson Delamide, may-ari ng Tapsi Express, ang kanyang paghanga kay Aldrin.
Aniya, isang magandang halimbawa ang binatilyo sa mga kabataan dahil sa dedikasyon nito sa trabaho, pag-aaral, at malinaw na pangarap sa buhay.
Ang kuwento ni Aldrin Suclan ay nagpapatunay na hindi hadlang ang kahirapan o murang edad upang magtagumpay.
Sa bawat araw na siya'y nag-aaral at sa bawat gabing siya'y nagtatrabaho, unti-unti niyang binubuo ang kinabukasang matagal na niyang pinapangarap.
