17/07/2024
لوگوں کی بات کر نہ زمانے کی بات کر
مجھ سے مِرے نبی ﷺکے گھرانے کی بات کر
نانا کا شہر کس لئے چھوڑا مجھے بتا
کربل کی سَمت شاہ کے جانے کی بات کر
مکر و فریب ،بزدلی کھل جائے گی تمام
مکتوب کوفیوں کے دکھانے کی بات کر
ی
وسف کے بھائیوں کے نہ قصے مجھے سنا
مثلِ عباس، ساتھ نبھانے کی بات کر
حر کو بنا کے پیشوا ،پکا حسینی بن
بازی پلٹ دے خُلد کمانے کی بات کر
عون و محمد، اکبر و اصغر، عباس تک
راہِ خدا میں سب ہی لٹانے کی بات کر
اک کوہِ استقامت و صبر و رضا چلا
پسرِ نبی کے رزم میں جانے کی بات کر
گردن کٹا کے سجدے میں قالو بلیٰ کہا
وعدوں کو اس طرح سے نبھانے کی بات کر
تبلیغ، درس، وعظ و نصیحت سبھی کو چھوڑ
نیزے پہ بھی قرآن سنانے کی بات کر
ظلم وستم کی تیرگی لمحوں میں دور ہو
شمعِ غمِ حسین جلانے کی بات کر
آلِ نبی کا غم جو میسر نہیں تجھے
حُبِ نبیﷺ کی جوت جگانے کی بات کر
دنیا میں سر اٹھانے کی خواہش جو ہو تجھے
زہرا کے در پہ سر کو جھکانے کی بات کر
نئیر تمہارے اپنےتو دامن میں کچھ نہیں
آباء کے ربطِ خاص پرانے کی بات کر
(نیئر صدیقی)
