04/11/2025
تھوڑا ہنس بھی لیا کرو
دو دن سے ساگ کھا کھا کر اک نک گیا تھا ، بھلا ہو امی کا گاؤں سے جب ساگ کی بوری آتی ہے ۔
امی جہازی سائز پتیلے میں ساگ چڑھا دیتی ہیں ، پکنے کے بعد قربانی کے گوشت کی طرح شاپر بھر کر فریزر میں فریز کر دیتی ہیں ۔
اگر ساگ کھانے سے انکار کرو تو ساگ کے ساتھ صلواتیں اور لعنتیں بھی کھانے کو الگ سے ملتی ہیں ۔
آج دوپہر امی سے کہا : " ماں تینوں خدا دا واسطہ وا" ( ماں آپکو اللہ کا واسطہ ہے) دوپہر کی روٹی ساگ کے بغیر دینا ۔
پر وہ ماں ہی کہاں جو پتر کی بات پر لبیک کہے ، امی ترنت بولی : " ساگ کھانا ہے تو بتاو اگر نہیں کھانا تو میرا سر مت کھاو" ۔
میں نے احتجاج کیا کہ ماں رات کو ساگ ، صبح ساگ والا پراٹھا ، دوپہر میں ساگ ۔ ایسی سزا تو جیل والے جیل میں قید قیدیوں کو بھی نہیں دیتے جو آپ اپنی اولاد کو دے رہی ہیں ۔
اس سے پہلے امی کا ہاتھ بیلن کی جانب بڑھتا میں نے کچن سے نکلنے میں ہی عافیت جانی ۔
اپنے کمرے میں بیٹھا دماغ میں سوچوں کے گھوڑے دوڑاتا رہا ، اچانک دماغ میں ایک خیال آیا اور فریج سے دس کلو والا ساگ سے بھرا شاپر اٹھائے امی کے پاس پہنچا ۔
امی یہ ساگ گرم کر دیں میرے دوست آ رہے ہیں ، انہوں نے کسی سے سنا ہے کہ آپ جیسا ساگ ہند و سندھ میں کوئی عورت نہیں پکا سکتی ۔
امی کو تعریف کا چونا لگا کر اپنے منصوبے کے اگلے حصے پر عمل کرتے ہوئے گھر سے باہر نکلا تو کچھ بچے گلی میں کھیل رہے تھے ۔
ان سے کہا کہ ہمارے گھر ساگ اور مکئی کی روٹی بانٹی جا رہی ہے گھر سے ڈونگے لا کر لے جاو ۔
پھر پانچ سات گھروں کے دروازے بجا کر انکو یہی بات کہی اور گھر جا کر چھپ گیا ، تھوڑی ہی دیر گزری ایک بچہ بڑا سا ڈونگا لیے ہمارے گھر داخل ہوا ۔
امی سے بولا کہ آنٹی امی کہہ رہی ہیں کہ ساگ دے دیں ، وہ ساگ کا ڈونگا لیکر باہر نکلا تو دوسرا تیسرا پھر چوتھا بچہ گھر آتا اور ساگ لیکر واپس اپنے گھر کو روانہ ہو جاتا ۔
اب خواتین کی باری تھی ، پہلے آنٹی کندن ڈونگا لیکر پہنچی پھر دو اور خواتین آ گئی ، جب آنٹی بانو ساگ لیکر جانے لگی تو پیچھے سے آنٹی فرحت آ گئی ۔
آنٹی فرحت نے امی کے ہاتھ میں ڈونگا پکڑایا تو امی بولی ساگ تو ختم ہو گیا ہے ، ابھی دیگچہ خالی کرکے جو تھا کندن کو ڈال دیا ہے ۔
امی نے آنٹی فرحت سے کہا ویسے یہ بتائیں کہ آپ کو کس نے بتایا کہ ہمارے گھر ساگ بٹ رہا ہے ؟
آنٹی فرحت ترنت بولی : "علی آیا تھا سب کو کہہ کر گیا کہ ہمارے گھر ساگ اور مکئی کی روٹی بانٹی جا رہی ہے جا کر لے آئیں ۔
یہ سننا تھا کہ امی نے چیخنا چلانا شروع کر دیا ، میں نے گھر سے بھاگنے میں ہی عافیت جانی ۔
نوٹ :- علی ابھی تک گھر سے فرار ہے ۔۔🤣🤣🤣
