21/01/2026
*پھولوں کا نکلنا اور پھل کا بننا*
(حصہ دوم)
آم کے پھولوں کے گچھے پر موجود آخری پھولوں میں پھل بننے کا رجحان زیادہ ہوتا ہے۔ یہ بھی ایک عام مشاہدہ کی بات ہے کہ اگیتی اقسام میں دوسری اقسام کی نسبت سب سے پہلے پھول نکلنے کا عمل شروع ہوتا ہے۔ اسی طرح جن اقسام کے پھل کا سائز بڑا ہوتا ہے ان کے پھولوں کا سائز بھی دیگر چھوٹے پھل والی اقسام سے بڑا ہوتا ہے مثلاً دسہری، انور رٹول وغیرہ کے پھول سندھڑی، سفید چونسہ وغیرہ سے چھوٹے ہوتے ہیں۔ عمومی طور پر آم کے پھولوں میں پھل بننے کا عمل مارچ کے مہینے میں اپنے عروج پر ہوتا ہے۔ اور یہ عمل زیادہ سے زیادہ اپریل کے پہلے ہفتے تک مکمل ہوجاتا ہے۔ اگر دن کا درجہ حرارت 30 ڈگری سینٹی گریڈ سے بڑھ جائے تو اس سے پھل بننے کا عمل بری طرح متاثر ہوتا ہے۔ جیسا کہ سال 2022 میں دیکھنے کو ملا۔ پنجاب میں 20 مارچ کے بعد درجہ حرارت 30 ڈگری سینٹی گریڈ سے بڑھنے کی وجہ سے پھول گرمی سے جل گئے تھے۔ اگیتی اقسام میں جلدی پھل بننے کی وجہ سے ان کا پھل گرمی کو برداشت کر گیا جبکہ دیگر اقسام کا پھل بالکل ابتدائی سٹیج پر ہی ختم ہو گیا تھا۔
موسم میں وقتی تبدیلی کی وجہ سے پھول نکلنے اور پھل بننے کا مرحلہ ایک ہفتہ جلدی یا تاخیر سے شروع یا مکمل ہو سکتا ہے۔ ابتدائی طورپر 0.1 سے 0.5 فیصد تک پھول پھل میں تبدیل ہوتے ہیں یہ شرح بہترین پھل بننے کی علامت ہے۔
تمام چھوٹے پھل بڑے نہیں ہوتے۔ بہت سا پھل مختلف وجوہات کی بنا پر مثلاً پودوں کی صحت، کیڑوں اور بیماریوں کا حملہ، خوراک اور پانی کیلئے مقابلہ اور گرمی کی شدت وغیرہ سے گِر جاتے ہیں 0.01 فیصد سے 0.03 فیصد تک پھول پھل کی شکل میں پودے سے برداشت کیے جاتے ہیں اور یہ بہترین پیداوار کے لئے اچھی نسبت تصور ہوتی ہے۔
پھل گِرنے کا عمل پھل بننے کی ابتداء سے پھل کی جسامت مکمل ہونے تک جاری رہتا ہے مگر گرنے والے پھل کا بڑا حصّہ پہلے ایک ماہ میں ہی گر جاتا ہے۔ آم کے پھولوں میں بارآوری (دانہ بننے) کا عمل ہوا اور کیڑوں کی مدد سے ہوتا ہے اور یوں پھول بننے کے مرحلہ پر کیڑے مار زہروں کا سپرے پھل بننے کے عمل کو 3 سے 4 دن تک کم کر دیتا ہے۔
(یہ ساری معلومات حاصل ہونے پر ہم یہ جاننا چاہیں گے کہ زیادہ سے زیادہ شاخوں سے پھول کیسے لئے جا سکتے ہیں، پانی کب لگایا جائے، کھاد کونسی دی جائےاور 30 ڈگری سینٹی گریڈ درجہ حرارت ہونے سے پہلے زیادہ سے زیادہ پھل بننے کو کیسے ممکن بنائیں؟؟ یہ انشاء اللہ آئیندہ پوسٹ میں ڈسکس کرتے ہیں)
محمد اقبال۔1
Copied!
