16/05/2026
Xaaji Diiriye — Halyeeygii Garabka u Noqday Halgankii SYL.
Taariikhda ummaduhu ma hilmaamaan ragii naftooda, maalkooda iyo maskaxdooda u huray dhismaha qaranimada. Soomaaliya gudaheeda, magaca Xaaji Diiriye wuxuu ka mid yahay magacyada dahabka ah ee lagu xuso sharaf, maamuus iyo qadarin aan dhammaad lahayn. Wuxuu ahaa odeygii aragga dheeraa ee garabka u noqday dhalinyaradii halganka waday, isla markaana laf-dhabar u ahaa aas-aaskii ururkii gobannimo-doonka Soomaaliyeed ee Somali Youth League (SYL).
Xaaji Diiriye ma ahayn oo keliya nin taageeray fikirka xorriyadda, balse wuxuu ahaa maalgaliyihii ugu muhiimsanaa ee suurageliyay in codka shacabka Soomaaliyeed yeesho meel uu ka unkamo.
👉 Isaga ayaa bixiyay xafiiskii ugu horreeyay ee SYL ee ku yaallay Via Roma, goobtii noqotay hoygii ay ka hanaqaadday rajadii xorriyadda iyo midnimada Soomaaliyeed. Halkaas ayay ka curtay himiladii dhalinyaradii 13-ka ahayd ee mustaqbalka Soomaaliya iftiinka u noqday.
Wuxuu ahaa aabbihii isu keenay dhalinyaradaas, kuna hagay waddadii wadajirka, geesinimada iyo qaran jacaylka. Intii ay dhalinyaradu qorsheynayeen halganka iyo himilooyinka shacabka, Xaaji Diiriye wuxuu ahaa maskaxdii waayeelnimada, taladii bislaatay iyo gacantii dhaqaale ee dhaqaajisay howlahaas.
Wuxuu fahmay in qaran la dhisaa uusan ku iman hadal oo keliya, balse uu u baahan yahay hoggaan, dhaqaale iyo dad naf-hurnimo leh.
Mudnaanta uu lahaa kuma aysan koobnayn maalgelin oo keliya; wuxuu ahaa nin bulshada dhexdeeda sumcad weyn ku lahaa, xiriirro badanna u adeegsan jiray danta ummadda Soomaaliyeed. Wuxuu si hagar la’aan ah ugu istaagay hirgelinta wax kasta oo uu u arkay inay dan guud u yihiin shacabka.
Maanta, marka la xuso halgamayaashii dhidibbada u taagay xorriyadda Soomaaliya, magaca Xaaji Diiriye wuxuu mudan yahay in lagu qoro xarfo dahab ah. Wuxuu ahaa geesi aan hub ku dagaallamin oo keliya, balse ku dagaallamay maalkiisa, maskaxdiisa iyo waayo-aragnimadiisa.
Taariikhdu waxay xusuusan doontaa inuu ahaa tiirkii ay ku istaagtay rajadii gobannimada Soomaaliyeed.
Alle ha u naxariisto halyeeygaas qaran, magaciisuna ha sii ahaado iftiin jiilasha dambe tusaya qiimaha waddaniyadda, midnimada iyo u adeegidda dadkooda.
,
Garaad Yusuf Farah
