19/07/2026
၁၉ ဇူလိုင်
== 🙏 ==
စျာပန မြင်ကွင်းဟာ
ရင်တွင်းမှာ
………. ပျောက်ပျက် မသွားဘူး။
ရုပ်ခန္ဓာက ကိုးလောင်း
ကျည်ချက်ပေါင်းက
………………………….. ခြောက်ဆယ် …
အပေါင်းအပါက
………………………….. ငါး + သုံးယောက် …
ဦးစောက တစ်ယောက်။
ဘုရားရှင်လက်ထက်
ဒေဝဒတ်က - တစ်ပါး
အဇာတသတ်က - တစ်ယောက်
စိဉ္စမာနက - တစ်ယောက်။
ဂျန်ဇီးတွေလက်ထက်
ဒေဝဒတ်က - မဘသ
အဇာတသတ်က - မအလ
စိဉ္စမာနက
တစ်တန်း နဲ့ တစ်သိုက် …
လူမိုက်က - ငါးသိန်း
ဦးစောက -သုံးယောက် …
အရှင်ဘုရား
တပည့်တော်တို့မှာ သေ မလောက်ပါပဲ … ဘုရား …
သမုဒ္ဒရာရဲ့ အနားသတ်ဟာ
ကမ်းစပ်ဆိုတာ မှန်ပေမယ့်
စစ်ပွဲရဲ့ အဆုံးသတ်ဟာ
ဂျန်ဇီးတွေလက်ထက်
စေ့စပ် ဆွေးနွေးခြင်း မဟုတ်တော့ဘူး
အမြစ်ပြတ် တိုက်ထုတ်ခြင်းပါပဲ အဘိုးရေ … ။
ရရင် - ရ
မရရင် - ချ ဆိုတဲ့ အဘိုးရဲ့စကားက
တော်လှန်ပြည်သူတွေအတွက်
ဆုံးဖြတ်ချက်ပါပဲ။
ခေတ်ဝန်ကို - ထမ်း
ခေတ်လမ်းကို - လျှောက်
ဒီလမ်းကို ဖြောင့်မယ်ထင်လို့
ဂျန်ဇီးတို့
ရွေး - လျှောက် ခဲ့ ကြ တာ မဟုတ်ပါဘူး အဘိုး။
ရုပ်ထုကို - ဖြို
ဓါတ်ပုံကို - ဖြုတ်
ငွေစက္ကူက ပုံတူရုပ်ကို
စိတ်ယုတ် - ကိုယ်ယုတ်
သူတို့ ဖြို-ဖြုတ်-ဖျက်-ပစ်ခဲ့ကြတယ်။
တော်လှန်ရေးဆိုတာ
ရင်ဘက်က လာတာ
နွားတွေက မသိဘူး။
တော်လှန်ရေးဆိုတာ
သွေးထဲက စီးလာတာ
ခွေးတွေက မသိဘူး။
အာဂယောက်ျား
စစ်သားများက
ပန်းများ ပွင့်သည်
နှင်းဆီကိုလည်း - ကြောက်သတဲ့ …
ပန်မှာကိုလည်း - ကြောက်သတဲ့ …
ပန်းသည်ကိုလည်း - ကြောက်သတဲ့ …
ကြောက်စိတ်ကို
သူတို့ရဲ့
ငယ်ထိပ်အထိ ထိုးထည့်ပေးနိုင်ခဲ့ပြီ အဘိုး။
ခေတ်ဆိုးအဆက်ဆက်
နောက်ထပ် - နောက်ထပ်
ဂဠုန်ဦးစော ပဉ္စမမျိုးဆက်
စစ်တပ်မှာ ထပ် - မရှိစေရအောင်
ဂျန်ဇီးမျိုးဆက်
အပြီးသတ် ဆက်တိုက်ပါ့မယ် အဘိုး …။
နိုင်ငံရေးက ထွက်ရင်
သစ်ပင်စိုက်မယ်
စာရေးမယ် - ဆိုတဲ့ အဘိုးရဲ့ဆန္ဒ
မြန်မာပြည် ဒီမိုကရေစီ အပြည့်အဝရတဲ့အခါ
ဂျန်ဇီးမျိုးဆက် အဆက်ဆက် ဆောင်ရွက်ပါ့မယ်။
ဆယ့်ကိုး - ဇူလိုင်
မိုးရေ အေးအေး
လေ အေးအေးနှင့်
အဘိုး - စိတ်အေးအေးဖြင့် ရှိ ပါ စေ။
ကဗျာရေးသူ - ကြည်ဟိန်း
၀၁:၃၅ နေ့လည်၊ ကြာသပတေးနေ့။
၁၆ ဇူလိုင် ၂၀၂၆
