09/04/2026
Ngayong Araw ng Kagitingan, buong puso nating inaalala at pinararangalan ang ating mga beterano—ang kanilang katapangan, sakripisyo, at walang kapantay na pagmamahal sa bayan.
Hindi natatapos ang ating pasasalamat sa paggunita lamang. Isinasabuhay natin ito sa konkretong pagkilos, sa pamamagitan ng mga batas na ating iniakda, pinangunahan, at isinulong upang tiyakin ang kanilang kapakanan:
Una, bilang principal author ng Republic Act No. 11164, na nagtaas sa buwanang old-age pension ng ating mga beterano mula ₱5,000 tungo sa ₱20,000, isang pagkilalang mas angkop sa kanilang sakripisyo.
Ikalawa, bilang pangunahing tagasuporta ng Republic Act No. 11958, na nagrasyonalisa at nagtaas ng disability pension para sa mga beteranong nasugatan sa serbisyo, upang matiyak na may sapat silang suporta sa gitna ng tumataas na gastos sa gamot at pangangalagang medikal.
Ikatlo, patuloy nating itinutulak ang pagkilala at suporta sa mga naiwang asawa ng ating mga beterano, upang sila man ay mabigyan ng sapat na proteksyon at benepisyo, lalo na ang mga nasa laylayan.
At ikaapat, bilang bahagi ng ating tungkulin, sinuportahan natin ang pagpapalakas ng serbisyong pangkalusugan para sa ating mga beterano, kabilang ang pagpapahusay ng Veterans Memorial Medical Center at ang pagtataguyod ng mga veteran wards sa mga ospital sa probinsya.
Sa bawat hakbang na ating ginagawa, layunin nating ipakita na ang kanilang kagitingan at kabayanihan ay hindi lamang ginugunita, ito ay pinapahalagahan at pinangangalagaan.
Ang kagitingan ng ating mga beterano ang pundasyon ng ating kalayaan. Nawa’y magsilbi itong inspirasyon sa atin upang ipagpatuloy ang paglilingkod nang may integridad, malasakit, at tunay na pagmamahal sa kapwa.
Mabuhay ang ating mga beterano. Mabuhay ang diwa ng kagitingan.
