22/07/2026
Breshëri dhe stuhitë kanë shkaktuar dëme të mëdha në bujqësi. Pemët dhe perimet janë dëmtuar rëndë në shumë zona të Kosovës. Fermerët me të drejtë po kërkojnë kompensim për humbjet e pësuara dhe uroj që institucionet të veprojnë sa më shpejt për t'i mbështetur.
Por, krahas kësaj situate, dua të ngre edhe një çështje tjetër, e cila pothuajse asnjëherë nuk është trajtuar seriozisht: gjendjen e bletarëve në Kosovë.
Sot jemi më 20 korrik 2026 dhe mund të thuhet se shumica e bletarëve po e mbyllin vitin me rendiment pothuajse zero, si pasojë e kushteve jashtëzakonisht të pafavorshme klimatike. Kjo nuk është vetëm humbje për bletarin, por edhe për bujqësinë dhe mjedisin, sepse bleta është hallka kryesore e pllenimit dhe e prodhimit bujqësor.
Megjithatë, përkundër kësaj gjendjeje alarmante, përkrahja institucionale ka qenë pothuajse zero. Nuk kemi parë as shqetësim, as vizita në terren, as analiza të situatës dhe as masa konkrete për t'u dalë në ndihmë bletarëve.
Është për t'u habitur se si një sektor kaq i rëndësishëm mund të lihet në heshtje, ndërkohë që përballet me një nga vitet më të vështira të dekadës. Ndryshimet klimatike po godasin çdo degë të bujqësisë dhe bletaria nuk mund të trajtohet si një sektor i dorës së dytë. Adaptimi i bujqësisë ndaj ndryshimeve klimatike është tashmë një sfidë e pranuar gjerësisht edhe në nivel rajonal dhe institucional.
Nuk po kërkojmë privilegje, por trajtim të barabartë, vëmendje dhe mbështetje, ashtu si çdo sektor tjetër që pëson dëme nga fatkeqësitë natyrore.
Është koha që edhe zëri i bletarëve të dëgjohet.
A. K
