01/05/2025
IN GESPREK MET…
Absa Wildeklawer Skolesporttoernooi (AWSST) wat in Kimberley gehou word, trek jaarliks al hoe meer mense - ook te danke aan die sportkodes wat uitbrei. Vanjaar is hokkie 'n nuwe toevoeging tot dié gewilde toernooi.
Vandag begin die junior en senior toernooie en duisende mense word tot Saterdagaand verwag om te kom deel in netbal, rugby, hokkie en sokker uit die boonste rakke.
“Dit is ongelooflik oor hoe die omvang van die toernooi die afgelope paar jaar toegeneem het. Mens besef nie hoeveel tyd en detail in die beplanning van ‘n toernooi soos dié ingaan nie. Net byvoorbeeld die mediese bystand die afgelope paar jaar vind op ‘n baie hoër vlak plaas. Ons het ook ‘n helikopter op gereedheid.
“Ons probeer alles georganiseerd en in plek kry. Paar jaar gelede was dit baie eenvoudiger.”
Aan die woord is Louis de K**k, eienaar van Wildeklawer Boerdery by Barkly-Wes, die groot gees agter die AWSST. Hy en sy vrou, Cora, het die jaar wat hulle borgskap met Griekwas geëindig het, besluit om by skolesport betrokke te raak. “Ek en Cora het gewonder hoe en waar ons die borgskap moet aanwend. Hoewel ek baie ingesteld is op akademie en kultuur, het ek beleef hoe sport ons eie kinders se lewens op daardie stadium beïnvloed het. Dit was opmerklik hoe sportdeelname ons kinders se karakter gebou het. Spanwerk. Deursettingsvermoë.
"Ons het besluit om jeugsport op 'n hoër vlak aan te bied. Dit wat ons by Griekwas destyds ervaar het, het ons deurgetrek na skole toe. Ons is deur André Markgraaff en ander vennote genader en op die ou end het ons twee en 'n half keer meer ingesit as wat gevra is. Tot vandag toe is dit ons beginsel om 'n goeie standaard vir die kinders te stel. Ons wou hê dit moet iets besonders op skolevlak wees.
"Dit gaan oor skolesport. Ons wil 'n lig gee om aan vas te hou. Sportdeelname is wonderlik vir kinders."
Niemand het voorsien dat die toernooi só sou ontwikkel nie, vertel Louis kinderlik opgewonde. "Ons wil seker maak dat dit elke jaar iets is om na uit te sien. Die mooi en die lekker moet nie verdwyn nie. Ons probeer om die toernooi te fasiliteer volgens die skole se behoeftes."
Louis verduidelik daar is kriteria vir die spanne wat genooi word om deel te neem. Dit beteken egter dat dit nie kan verander nie. Skole word genooi op grond van prestasie deur die jaar.
Die uitnodigingspanne vorm 'n groot deel van die toernooi. "Dit is baie belangrik dat die omliggende gemeenskappe ook voordeel trek uit die toernooi. Dit bied groot geleenthede vir daardie kinders. Hulle leef vir die toerenooi!
“Toe Absa genader is om moontlik betrokke te raak by die toernooi, het hulle onmiddellik gesê hulle is in. Hulle het dieselfde visie as Wildeklawer Boerdery wat skolesport betref en wil ook in hul gemeenskappe, wat hulle bedien, betrokke wees”, sê Louis.
“Ons kan hierdie toernooi glad nie sonder die borge aanbied nie. Ons is baie dankbaar vir hul betrokkenheid en reuse bydrae wat hulle jaarliks maak. Daar is ook baie geleenthede vir besighede in Kimberley om hierdie tyd met goeie sakevernuf voordelig te benut.
“Ons is geweldig dankbaar vir die voorreg om hierdie uitsonderlike toernooi te kan aanbied. Ons besef die verantwoordelikheid wat ons het om dit jaarliks te verbeter om dit vir elkeen ‘n wonderlike ervaring te maak.
“Mag dit vir elkeen wat die toernooie bywoon, met goeie herinneringe veilig terugkeer huis toe”, is Louis se wense.
