02/10/2026
BOBOTIE ❤️
Ek weet nie van julle nie, maar vir my is Bobotie een van daardie geregte wat altyd soos huis voel.
Ek maak myne eenvoudig, met gewone bestanddele wat ek sommer in my kombuis het.
En hier is nog iets wat ek altyd doen…
Ek maak ALTYD seker daar is Bobotie oor! 😂
Want die oorskiet word die lekkerste Bobotie-pasteitjies. Ek maak hulle, vries hulle rou en dan kan ek hulle bak wanneer ek hulle nodig het.
Soms maak ek sommer die Bobotie dubbel, net om seker te maak daar is genoeg vir die pasteitjies ook. 😋
Resep:
Bestanddele:
2 uie, gekap
Kookolie of botter vir braai
1 kg maalvleis
1 sny witbrood
250 ml melk
1 eier
15 ml kerriepoeier
1½ eetlepel suiker
10 ml sout
2,5 ml peper
7,5 ml borrie
30 ml asyn
125 ml rosyne (opsioneel)
45 ml blatjang
4 lourierblare of suurlemoenblare
Vir die bolaag:
125 ml melk – jy kan die melk gebruik waarin die brood geweek het
1 eier
Metode:
Verhit die oond tot 180 °C.
Week die brood in die 250 ml melk.
Braai die uie in ’n bietjie olie of botter tot sag en deurskynend. Voeg die kerriepoeier en borrie by en braai dit vir ongeveer ’n minuut.
Voeg die maalvleis, sout, peper, asyn, suiker, blatjang en rosyne by en braai tot die maalvleis gaar is.
Druk die oortollige melk uit die brood, maar hou die melk vir die bolaag. Krummel die brood by die maalvleismengsel en meng alles goed.
Skep die mengsel in ’n gesmeerde oondbak en druk die lourierblare of suurlemoenblare bo-op in die vleis.
Klits die eier en melk vir die bolaag saam en giet dit oor die maalvleis.
Bak vir 30–45 minute, of totdat die bolaag mooi gestol en goudbruin is.
En dan natuurlik…
Moenie alles opeet nie! 😂
Maak seker daar is ’n bietjie oor vir Bobotie-pasteitjies. ❤️
